Zargin DPO da Daukar Wata Yarinya zuwa Gidansa: Rundunar 'Yan Sanda na Bincike

Katsina Times

Wata kungiya mai zaman kanta ta kare hakkin dan Adam, mai suna Maiyasin Human Rights, ta shigar da korafi a hedkwatar 'yan sanda ta Jihar Katsina, bisa zargin wani DPO a garin Dutsinma ya dauki wata yarinya da ake tsare da ita daga ofishin 'yan sanda zuwa gidansa, inda ta kwana.

A cewar kungiyar, kafin ta dauki matakin kai korafin, ta gudanar da bincike mai zurfi tare da tattara hujjoji da suka tabbatar da cewa yarinyar ta kwana a gidan DPO ba a ofishin 'yan sanda ba.

Bayanin Kungiyar

Kungiyar ta bayyana cewa kwamishinan 'yan sanda na Jihar Katsina, Aliyu Musa, ya dauki batun da muhimmanci sosai. Wannan ya sa ya kafa kwamitin bincike kan lamarin, tare da dakatar da DPO din daga aikinsa har sai binciken ya kammala.

Kungiyar ta yaba da yadda kwamishinan ke gudanar da aikinsa da gaskiya da adalci. Sun ce wannan abu ya nuna cewa akwai kwakkwarar shaida da ke nuna cewa an yi rashin da'a.

Yadda Lamarin Ya Faru

Bisa bayanan da kungiyar ta tattara, an ce yarinyar ta yi batan dabo kafin a samu nasarar gano ta. Daga nan aka kai ta ofishin 'yan sanda a Dutsinma, amma saboda dare yayi, aka bar ta a ofishin don ta kwana. Sai dai DPO din ya umarci 'yan uwan yarinyar da suka zo daukarta da su bari zai kai ta gida da kansa da safe.

Da safe, 'yan uwan yarinyar suka koma ofishin don kawo mata abinci, amma sai suka tarar cewa bata nan. 'Yan sandan da suka karbi aiki da safe sun ce bata kwana a ofishin. A lokacin ne rikici ya barke tsakanin 'yan sanda da 'yan uwan yarinyar, har sai da aka ga yarinyar ta dawo ofishin, amma sanye da kaya daban da wadanda take da su da dare.

Tuhuma da Bincike

Kungiyar ta ce yarinyar ta tabbatar musu cewa ta kwana ne a gidan DPO, kuma shi ne ya ce mata ta tafi gidan don ta kwana. Sun ce sun dauki muryarta da ke tabbatar da hakan.

Bayan gudanar da bincike mai zurfi, kungiyar ta mika takardar koke zuwa hedkwatar 'yan sanda ta jihar Katsina, domin a dauki matakin da ya dace.

Rundunar 'yan sanda tana  gudanar da bincike kan wannan zargi. Ana sa ran binciken zai fayyace gaskiyar lamarin da kuma daukar matakan da suka dace domin tabbatar da adalci.

Wannan labari yana cigaba da jan hankalin jama’a da dama, yayin da ake jiran sakamakon binciken rundunar 'yan sanda kan wannan zargi.